CyberCTM專欄 - 寂然手作仔

問：你贊成加人工嗎？

答：加人工當然係好事啦，我哋依家士氣好低落呀，工作壓力又大，加咗人工之後一定會士氣大振，無哂壓力。

問：你係唔係保證加咗人工之後就唔會再做錯事，唔會再比人鬧？

答：加人工還加人工，做錯事還做錯事，請你唔好將兩件事混淆。問題嘅重點係我做咩事都有機會比人鬧，咁加我人工我比人鬧多兩句，我會覺得d人鬧得有道理囉。

問：你認為自己的貢獻同所收薪酬成正比嗎？

答：人才難求，青春無價，我哋d工作係唔可以量化，我哋嘅貢獻亦都真係好大，出面班友個個以為自己好勁，其實比佢坐我個位，可能仲大件事呀。

問：咁點解你仲要做落去，做到唔開心時，有無考慮過轉換環境？

答：你唔好玩我啦，我有今日咁嘅地位真係唔係一朝一夕，就算係一張廁紙一條底褲都有佢本身價值啦，係咪先，所以我真係好想貢獻自己嘅力量，為個社會做多d事呀。

問：如果無人工加，會唔會影響你為社會做多d事嘅熱情呀？

答：咁梗係唔會，我哋唔係真係為錢架，為使命感，同埋我一個人有貢獻，我全家都光榮呀，我哋本身都夠食夠住，真係唔係為錢。

問：咁係為咩呢？

答：為理想，為抱負，為報答社會對我嘅支持同期望，為我嘅同事…….

問：即係可以唔加人工？

答：咁又唔係，你要明白我哋好大壓力，士氣又好低落……

問：點解來來去去都係呢d 原因?

答：你問第二個啦，我好大壓力呀！

如果你對以上寫的有同感仲笑得出，我估計加人工可能無你份，從來唔敢質疑人性的偉大，但千祈唔好睇小人性的陰暗面。我們都只是冷眼旁觀的一分子，冷眼看世情之後，不妨再加幾聲冷笑。

這篇文章發表於 2008年06月16日 星期一 12:23 pm，並被分類於手作仔。 您可以通過訂閱 RSS 2.0 跟蹤對這篇文章的評論。 您可以滾動到頁面下方發表一條評論。Ping 功能目前未啟用。